Joriy yilning 27-mart kuni Tojikiston Respublikasi So‘g‘d viloyati B.G‘afurov tumanida qishloq xo‘jaligi sohasi bo‘yicha O‘zbekiston va Tojikiston agrar sohasi olimlari ishtirokida keng qamrovli qo‘shma seminar-trening tashkil etildi.
Seminar avvalida Don va dukakli ekinlar ilmiy-tadqiqot instituti direktori Ravshanbek Siddiqov ishtirokchilarga g‘allachilikning bugungi dolzarb masalalari, iqtisodiy ko‘rsatkichlari hamda xalqaro tajribalar asosida g‘alla yetishtirish biologiyasi, agrotexnik tadbirlar, tejamkor texnologiyalar va innovatsion usullar haqida ma’ruza qildi.
Shundan so‘ng akademik M. Mirzayev nomidagi Bog‘dorchilik, uzumchilik va vinochilik ilmiy-tadqiqot instituti olimlari bog‘dorchilik va uzumchilikda zamonaviy texnologiyalar, mevali daraxtlarga shakl berish va kesish usullari, shuningdek, intensiv bog‘larni tashkil etish bo‘yicha muhim ma’lumotlarni taqdim etdilar.
Seminarning keyingi qismida Sabzavot-poliz ekinlari va kartoshkachilik ilmiy-tadqiqot instituti olimlari sabzavot-poliz mahsulotlarini yetishtirishda zamonaviy texnologiyalar, urug‘lik yetishtirish, tuproq-iqlim sharoitiga mos ekinlarni joylashtirish va ilg‘or tajribalarni joriy etish mavzularida ma’ruzalar qildilar.
Seminarda Tojikiston Respublikasi So‘g‘d viloyatida joylashgan ilmiy tashkilotlar, tuman qishloq xo‘jaligi bo‘limi, fermerlar va qishloq xo‘jaligi mahsulotlarini yetishtiruvchi korxonalarning 70 nafar xodimi ishtirok etdi.
Tadbir davomida ishtirokchilar ma’ruza qilgan olimlarga o‘zlarini qiziqtirgan savollarni berib, batafsil javob oldilar. Shuningdek, ilmiy-tadqiqot institutlari tomonidan tayyorlangan tavsiyalar va taqdimot materiallari seminar ishtirokchilariga tarqatildi.
Tadbir yakunida So‘g‘d viloyatida joylashgan ilmiy tashkilotlar vakillari bu kabi seminarlarni muntazam o‘tkazib borish bo‘yicha takliflar bildirdi.
