Xabaringiz bor, Qishloq xo‘jaligidagi bilim va innovatsiyalar milliy markazi direktori Shuhrat Otajonov boshchiligidagi, tizimdagi bir necha ilmiy muassasalar rahbarlaridan iborat delegatsiya shu kunlarda Ozarbayjon Respublikasida xizmat safarida bo‘lib turibdi.
Tashrif doirasida qishloq xo‘jaligi sohasidagi ilmiy-tadqiqot tashkilotlari o‘rtasida o‘zaro hamkorlikni mustahkamlash, tajriba almashish va yangi ilmiy loyihalarni amalga oshirish masalalari muhokama qilindi. Safarning muhim natijalaridan biri sifatida Milliy markaz tizimidagi Sabzavot, poliz ekinlari va kartoshkachilik ilmiy-tadqiqot instituti hamda Ozarbayjon Respublikasi Qishloq xo‘jaligi vazirligi qoshidagi Sabzavotchilik ilmiy-tadqiqot instituti o‘rtasida hamkorlik memorandumi imzolandi.
Mazkur hujjat olimlar va mutaxassislar ishtirokida seleksiya va urug‘chilik ishlarini rivojlantirish, noan’anaviy ekinlar ustida birgalikda tajriba o‘tkazish, fitosanitariya tahlillar olib borish, shuningdek, resurs va energiya tejamkor texnologiyalarni joriy etish kabi yo‘nalishlarda hamkorlikni nazarda tutadi. Hamkorlik doirasida yosh olimlar uchun malaka oshirish dasturlari, ilmiy tadbirlar tashkil etish va qo‘shma tadqiqot natijalarini xalqaro jurnallarda chop etish rejalashtirilgan.
Muzokaralar yakunida amaliy “yo‘l xaritasi” ishlab chiqilib, ilk qo‘shma tajriba ishlarini joriy yilning ikkinchi yarmida boshlashga kelishib olindi. Safar davomida qayd etilgan kelishuvlar qishloq xo‘jaligidagi ilmiy salohiyatni yanada yuksaltirishga xizmat qilishi kutilmoqda.
