Bugun Qishloq xo‘jaligida bilim va innovatsiyalar Milliy markazida Ilmiy-texnik kengashning navbatdagi yig‘ilishi bo‘lib o‘tdi. Yig‘ilishda qator muhim masalalar ko‘rib chiqildi.
Yig‘ilishning birinchi masalasi — dissertatsiya natijalarini amaliyotga tatbiq etilganligini tasdiqlash bo‘yicha kelib tushgan murojaatlar bo‘yicha hisobot eshitildi. Milliy markaz bo‘lim boshlig‘i Ikrom Qorabayev hisobot berdi. Unga ko‘ra, umumiy 91 ta murojaatdan 66 tasi bo‘yicha ma’lumotnoma berish tavsiya etildi, 25 tasi esa rad etildi. Shuningdek, texnik ekinlar va qishloq xo‘jaligini mexanizatsiyalash sohasidagi bo‘limga 42 ta murojaat kelib tushgan, shundan 26 tasi maqullandi, 16 tasi rad etildi.
Hisobotdan so‘ng Kengash raisi Shuhrat Otajanov fikr bildirish uchun so‘z berdi. Kengash a’zosi Nodirjon Abdurahmonov bu masalaning ahamiyatini ta’kidlab, ma’lumotnomalarga imzo qo‘yayotgan mas’ullar davlat oldida shaxsiy javobgarlikni his qilishi kerakligini bildirdi. Shuhrat Otajanov esa eski tartibdan voz kechish va yangi, sodda va shaffof tartib ishlab chiqish kerakligini ta’kidladi va takliflar berishni so‘radi.
Shuningdek, yig‘ilishda ilmiy faoliyatga oid davlat dasturlari doirasida e’lon qilish uchun taqdim etilgan tematik mavzular, oliy ta’limdan keyingi ta’lim institutini ochish, ilmiy kengash ochish bo‘yicha murojaatlar hamda “Agroinnovatsiya va yoshlar” ko‘rik-tanlovi natijalari asosida moliyalashtirish uchun tavsiya etilgan startap loyihalar kabi masalalar ham Kengash a’zolari tomonidan muhokama qilindi. Barcha masalalar yuzasidan tegishli qarorlar qabul qilindi va takliflar asosida xulosalar chiqarildi.
