Bugun Janubiy dehqonchilik ilmiy-tadqiqot institutida Qishloq xo‘jaligida bilim va innovatsiyalar milliy markazi direktori Shodmon Namozov rahbarligida kengaytirilgan yig‘ilish bo‘lib o‘tdi.
Yig‘ilishda institut faxriylari, seleksioner olimlar, doktorantlar hamda ilmiy xodimlar ishtirok etdi. Unda so‘nggi yillarda ilmiy muassasada amalga oshirilgan ilmiy-innovatsion ishlar, yaratilgan yangi navlar, yosh kadrlarning ilmiy salohiyatini oshirishga qaratilgan chora-tadbirlarning samaradorligi keng muhokama qilindi.
Shuningdek, yig‘ilish davomida institut rahbarligida bir necha yillar davomida samarali faoliyat olib borgan direktor Oybek Amanov Qishloq xo‘jaligi vazirligining tegishli buyrug‘iga asosan Milliy markaz direktori o‘rinbosari — Ilmiy-tadqiqotlar majmuasi rahbari lavozimiga tayinlangani jamoaga e’lon qilindi.
Shu paytgacha Lalmikor dehqonchilik ilmiy-tadqiqot instituti direktori lavozimida faoliyat yuritib kelgan Diyor Jo‘rayev esa Janubiy dehqonchilik ilmiy-tadqiqot instituti jamoasiga yangi direktor sifatida tanishtirildi.
Tadbir yakunida markaz direktori Shodmon Namozov so‘zga chiqib, yangi lavozimga tayinlangan rahbarlarni samimiy tabrikladi hamda kelgusidagi ilmiy faoliyatida ularga yuksak natijalar tiladi.
