Oʻzbekiston va Xitoy oʻrtasida barcha sohalarda hamkorlik aloqalari yil sayin mustahkamlanib bormoqda. Bu albatta oʻzining kutilgan natijasini beryapti. Jumladan, qishloq xoʻjaligini rivojlantirishdagi oʻzaro hamkorliklar ham yangi bosqichga koʻtarilmoqda. Ayniqsa, bu soha ilm-fani borasidagi hamkorliklarda yaqqol koʻzga tashlanmoqda. Qishloq xoʻjaligida bilim va innovatsiyalar milliy markazi direktori, akademik Shodmon Namozov va Xitoyning urugʻchilik va seleksiyaga ixtisoslashgan “Xinjiang Jinghua Seeds Co., Ltd.” kompaniyasi direktori Chengbo Jiang oʻrtasida boʻlib oʻtgan uchrashuvda ham bu alohida eʼtirof etildi.
Samimiy va ishonchli ruhda kechgan muloqotda Markaz rahbari mehmonlarga tashkilotning ilmiy salohiyati, infratuzilmaviy imkoniyatlari va amalga oshirilayotgan vazifalar haqida maʼlumot berdi. Oʻz navbatida janob Chengbo Jiang ham Qishloq xoʻjaligida bilim va innovatsiyalar milliy markazi rahbariyati va tizimdagi Paxta seleksiyasi, urugʻchiligi va yetishtirish agrotexnologiyalari ilmiy-tadqiqot instituti rahbarining oʻtgan yili Xitoyga amalga oshirgan xizmat safari davomida erishilgan dastlabki kelishuv asosida olib borilayotgan ilmiy hamkorlik ijobiy natija berayotganini mamnuniyat bilan qayd etdi.
Muloqot davomida tomonlar qishloq xoʻjaligida urugʻchilik va seleksiya yoʻnalishida hamkorlikni yanada kengaytirishga kelishib oldi. Shuningdek, Qishloq xoʻjaligida bilim va innovatsiyalar milliy markazi hamda “Xinjiang Jinghua Seeds Co., Ltd.” oʻrtasida anglashuv memorandumi imzolandi.
Yuqori hosildor, qurgʻoqchilik va shoʻrga chidamli paxta navlarini birgalikda yaratish, ertapishar va yuqori zichlikda ekiladigan paxta navlari hamda bugʻdoydan keyingi ekish modellarini namoyish etish, molekulyar markerga asoslangan qoʻshma seleksiya laboratoriyasini tashkil etish, Xitoyning Xaynan provinsiyasi (Sanya)da mavsumdan tashqari seleksiya (off-season) bazasini barpo etish va paxta seleksiyasi boʻyicha kadrlar tayyorlash hamda texnik oʻquv-treninglarni amalga oshirish memorandumning asosiy shartlari sifatida belgilandi.
Mazkur sheriklik iqlim oʻzgarishi sharoitida seleksiyani jadallashtirish, mahalliy sharoitga mos chidamli paxta navlarini amaliyotga tezkor joriy etish va qishloq xoʻjaligida ijtimoiy-iqtisodiy samaradorlikni oshirishga xizmat qiladi.
Bundan tashqari, qoʻshma laboratoriya va off-season baza orqali nav tanlash jarayonlari qisqaradi, ilmiy yaratuvchan salohiyat ortib, ikki davlat olimlari oʻrtasida zamonaviy texnologiyalar almashinuvi kengayadi.
