
Dengizga chiqish imkoniyati bo‘lmagan rivojlanayotgan davlatlarning oziq-ovqat xavfsizligiga bag‘ishlangan nufuzli xalqaro forum o‘z ishini yuqori saviyada davom ettirmoqda.
Bugungi kunda dunyoda oziq-ovqat xavfsizligi masalasi tobora dolzarb ahamiyat kasb etmoqda. Aholi sonining o‘sishi, iqlim o‘zgarishi, suv resurslarining cheklanishi, logistika zanjirlaridagi uzilishlar va xalqaro bozorlardagi o‘zgarishlar oziq-ovqat mahsulotlarini yetishtirish va uni aholiga barqaror yetkazib berishni barcha davlatlar uchun strategik vazifaga aylantirmoqda.
Forum aynan ana shu muammolarni ochiq muloqot va konstruktiv fikr almashinuvi orqali muhokama qilish uchun muhim xalqaro maydonga aylanmoqda.
Tadbirda xalqaro tashkilotlar, xorijiy davlatlar va agrar soha vakillari tomonidan oziq-ovqat xavfsizligini ta’minlash, qishloq xo‘jaligida barqaror ishlab chiqarishni rivojlantirish, zamonaviy agrotexnologiyalarni joriy etish, savdo va logistika imkoniyatlarini kengaytirish yuzasidan fikr va takliflar ilgari surilmoqda.
Muloqotlarda bir haqiqat alohida namoyon bo‘lmoqda: oziq-ovqat xavfsizligi – birgina davlatning vazifasi emas. Bu umumiy mas’uliyat va xalqaro hamkorlikni talab etadigan global masaladir.
Forumda so‘zga chiqqan O‘zbekiston Respublikasi qishloq xo‘jaligi vaziri Ibrohim Abdurahmonov ham bugungi murakkab sharoitda oziq-ovqat xavfsizligini ta’minlashga kompleks yondashuv zarurligini ta’kidladi.
Vazirning qayd etishicha, oziq-ovqat xavfsizligini ta’minlash faqatgina qishloq xo‘jaligi mahsulotlarini ko‘proq yetishtirish bilan cheklanmaydi. Buning uchun ishlab chiqarish, qayta ishlash, saqlash, logistika, savdo, ilm-fan, innovatsiya va moliyalashtirish kabi yo‘nalishlarni yagona tizim sifatida rivojlantirish lozim.
Ayniqsa, davlatlar o‘rtasidagi tajriba almashinuvi, ilg‘or texnologiyalarni birgalikda joriy etish, ilmiy tadqiqotlarni qo‘llab-quvvatlash va qo‘shma loyihalarni amalga oshirish bugungi kunning muhim talablaridan biri ekani qayd etildi.
Mazkur xalqaro forum yagona maqsad yo‘lida davlatlar va tashkilotlarni birlashtirib, tajriba, bilim va tashabbuslarni yagona manfaat — global oziq-ovqat xavfsizligi yo‘lida birlashtirishga xizmat qilmoqda.
Zero, oziq-ovqat xavfsizligi chegaralarni bilmaydi. Bir hududdagi muammo boshqa mintaqalarga ham ta’sir qilishi mumkin. Shu bois bugungi kunda hamjihatlik, ochiq muloqot va o‘zaro manfaatli xalqaro hamkorlik har qachongidan ham muhim.





Manba: Telegram kanali



